Мемлекет басшысы Қасым-Жомарт Кемелұлы Тоқаевтың бастамасымен мемлекетіміздегі Конституциялық реформалар еліміздің келешегі үшін жасалынып жатқан игі істер екені белгілі. Осы өзгерістердің ішінде парламенттің рөлі мен мәртебесінің өзгеруі өкілді билік тармағына сенім күшейеді дегенді білдіреді. Мәселен, Президент Конституциялық Соттың және Жоғары сот Кеңесінің төрағаларын тағайындау үшін Сенаттың келісімін алады. Сондай-ақ Президент Сенатқа 15 емес, 10 депутат тағайындайды. Оның 5-еуі Қазақстан халқы Ассамблеясының ұсынысы бойынша тағайындалады. Қазақстан халқы Ассамблеясының Мәжілістегі квотасы Сенатқа беріледі. Оның саны 9-дан 5 депутатқа қысқарады. Соған сәйкес, Мәжіліс депутаттарының жалпы саны 107-ден 98-ге азайып, сапалы жұмыстар талап етілетін болады. Ал, Мәжіліс депутаттары аралас сайлау жүйесімен, яғни пропорционалды және мажоритарлы жүйе бойынша сайланады. Бұл аралас сайлау жүйесі барлық азаматтардың құқықтарын толық сақтауға, сайлаушылардың мүддесін қорғауға тиімді мүмкіндіктер береді.
Сайлаушылардың бір мандатты сайлау округі бойынша сайланған Мәжіліс депутаттарынан мандатты кері қайтарып алу құқығы енгізіледі. Бұл өз кезегінде сайлаушылардың саяси талаптарын іске асырып, депутаттардың жауапкершілігін арттырады. Әр халық қалаулыларының тұрғындарға айтылған уәдесін мүлтіксіз орындауды талап етеді. Мәжілістің құзыреті кеңейіп, республикалық бюджеттің атқарылу сапасына парламенттік бақылау күшейеді. Сонымен қатар, республикалық бюджеттің атқарылуын бақылау жөніндегі есеп комитеті Жоғары аудиторлық палата болып қайта құрылады. Оның төрағасы жылына екі рет Мәжіліс депутаттарының алдында есеп береді. Бұл Мәжілістің және жалпы Парламенттің мәртебесін одан әрі күшейте түседі.
Саяси жүйеде тепе-теңдік және тежемелік тетіктерді нығайту және заң шығару жұмысын оңтайландыру мақсатында Мәжіліске заңдарды қабылдау, ал Сенатқа заңдарды мақұлдау не мақұлдамау құзыреті беріледі.
Парламент конституциялық заңдарды Палаталардың бірлескен отырысында, кемінде екі оқылымда қабылдайтын болады. Сонда сапалы әрі қоғамның игілігі үшін жұмыс жасайтын нақты заңдар қабылданып, тиімді заңдар халық үшін іске асырылатын болады.
Шымкент қаласының мәслихат депутаты, AMANAT партиясы фракциясының мүшесі, республикалық штабтың мүшесі Қожамжарова Дария Пернешқызы
