Қазақстан Республикасының Президенті Қасым-Жомарт Кемелұлы Тоқаевтың Конституциялық реформаларды іске асыруда азаматтардың құқықтарын қорғау тәсілдерін жетілдіруді нақтылап өтті. Яғни, Конституциялық Кеңес Конституциялық Сот болып қайта құрылады. Конституциялық Сот азаматтардың өтініштері бойынша олардың Конституцияда бекітілген құқықтары мен бостандықтарына тікелей қатысты Қазақстан Республикасының нормативтік-құқықтық актілерінің Республика Конституциясына сәйкестігін қарайтын болады.
Өлім жазасын жою туралы шешім конституциялық деңгейде түпкілікті бекітіледі. Прокуратураның құзыреті, оның жасақталуы мен қызмет тәртібі Конституциялық заңмен белгіленеді. Бұл құқық қорғау қызметінің жүйелі жұмыс істеуін және заңда белгіленген тәртіпке сәйкес мемлекет атынан Қазақстан Республикасының аумағында заңдылықтың сақталуын қадағалауды күшейтуге тиіс.
Конституцияның жаңа нормалары Адам құқықтары жөніндегі уәкілге иммунитет береді. Ол азаматтардың құқығы мен бостандығын қорғау кезінде қандай да бір өзге мемлекеттік органдар мен лауазымды тұлғаларға тәуелді болмайды, ешкімге есеп бермейді. Ол өз жұмысында Конституциялық Сотқа жүгіне алады. Адам құқықтары жөніндегі уәкілдің құқықтық мәртебесі мен қызметін ұйымдастыру Конституциялық заң арқылы айқындалады.
Сондықтан реформаның негізі азаматтардың құқықтарының қорғалуы – демократиялық қағидаларға сай болатыны белгілі. Әлемдік өркениетті елдердің тәжірибесі көптеген жетістіктерге жеткізеді деген сенімдемін!
Шымкент қаласының мәслихат депутаты, AMANAT партиясы фракциясының мүшесі, партиялық бақылау комиссиясының төрайымы Қожамжарова Дария Пернешқызы
